کراچی: وزیراعلیٰ سندھ مراد علی شاہ نے مالی سال 2026-27 کا ٹیکس فری بجٹ سندھ اسمبلی میں پیش کرتے ہوئے سرکاری ملازمین کی تنخواہوں اور پنشن میں 7 فیصد اضافے جبکہ کم از کم ماہانہ اجرت 40 ہزار روپے سے بڑھا کر 43 ہزار روپے مقرر کرنے کا اعلان کیا ہے۔
سندھ اسمبلی کا بجٹ اجلاس اسپیکر اویس قادر شاہ کی زیر صدارت منعقد ہوا، جہاں وزیراعلیٰ کی تقریر کے دوران اپوزیشن جماعتوں اور ایم کیو ایم کے اراکین نے احتجاج اور شور شرابہ کیا۔ اپوزیشن نے بجٹ پر اظہارِ خیال کا مطالبہ کیا، جس پر ایوان میں کشیدگی پیدا ہوگئی۔
بجٹ تقریر میں مراد علی شاہ نے کہا کہ سندھ حکومت نے 260 ارب روپے کی قومی معاونت کے باوجود صوبے کے آئینی حقوق اور ترقیاتی ترجیحات کا بھرپور تحفظ کیا ہے۔ انہوں نے کہا کہ بجٹ عوامی فلاح، مالیاتی استحکام، آئینی حقوق اور قومی ترقی کے اصولوں پر مبنی ہے۔
وزیراعلیٰ نے کراچی میں سندھ انٹرنیشنل فنانشل سینٹر کے قیام، سندھ سیف سٹیز پروگرام کی توسیع اور مختلف ترقیاتی منصوبوں کے لیے اربوں روپے مختص کرنے کا بھی اعلان کیا۔ انہوں نے بتایا کہ تعلیم، صحت، بلدیاتی ترقی، ٹرانسپورٹ، زراعت اور پانی کے منصوبوں کے لیے خصوصی فنڈز رکھے گئے ہیں۔
بجٹ میں ایڈہاک ریلیف الاؤنس 2022 اور 2025 کو بنیادی تنخواہ میں ضم کرنے، زرعی سپر ٹیکس 10 فیصد سے کم کرکے 8 فیصد کرنے اور سماجی تحفظ کے مختلف پروگراموں کو مزید وسعت دینے کا بھی اعلان کیا گیا۔
